Turkiya parlamenti prezident Rajab Toyyib Erdo‘g‘anning Ozarboyjonga harbiylarni yuborish haqidagi farmonini ma'qulladi.
Ozarboyjon prezidenti Ilhom Aliyev Rossiya va Turkiya harbiylari Tog‘li Qorabog‘dagi "ozarboyjonlar va armanlar xavfsizligini ta'minlash bo‘yicha operatsiyalarda" ishtirok etishini aytdi.
Uning so‘zlariga ko‘ra, Rossiya, Ozarboyjon va Armanistonning Tog‘li Qorabog‘da o‘t ochishni to‘xtatish to‘g‘risidagi bayonotini mintaqadagi barcha mamlakatlar qo‘llab-quvvatladi.
"Barcha qo‘shnilarimiz qo‘llab-quvvatlashlarini bildirdi. Ikki qo‘shnimiz - Rossiya va Turkiya ozarboyjonlar va armanlar xavfsizligini ta'minlash bo‘yicha operatsiyalarda ishtirok etadi", - dedi Aliyev.
9 noyabrda Ozarboyjon prezidenti Ilhom Aliyev, Armaniston bosh vaziri Nikol Pashinyan va Rossiya prezidenti Vladimir Putin Tog‘li Qorabog‘da o‘t ochishni to‘xtatish to‘g‘risida bayonot imzoladi. Unga ko‘ra, Ozarboyjon va Armaniston egallab turgan pozitsiyalarida qoladi, mintaqada rossiyalik tinchlikparvarlar joylashtiriladi.
Avvalroq Turkiya parlamenti prezident Rajab Toyyib Erdo‘g‘anning Ozarboyjonga harbiylarni yuborish haqidagi farmonini ma'qullagandi.
