Britaniya Brexit bo‘yicha muzokaralar boshi berk ko‘chaga kirib qolganini ma'lum qildi

London va Bryussel o‘rtasidagi savdo muzokaralari boshi berk ko‘chada turibdi. Bu haqda Britaniya adliya vaziri Maykl Gouv ma'lum qildi, deb xabar qilmoqda Reuters.

 Qayd etilishicha, tomonlar baliqchilik, boshqaruv qoidalari va bahslarni hal etish masalalarida kelisha olmayapti.

 "YeI hali ham bizning suvlarimizdagi baliqchilikdan katta ulush olmoqchi – bu YeIni tark etayotganimizni hisobga oladigan bo‘lsak, shunchaki adolatsizlik", - dedi Gouv.

 Tomonlar Britaniya YeIdan to‘rt haftadan so‘ng butunlay chiqib ketgach paydo bo‘lishi mumkin bo‘lgan inqirozning oldini olish uchun savdo kelishuvi borasida kelishib olmoqchi.

Avvalroq YeI 10 dekabrda bo‘lib o‘tadigan sammitga qadar London bilan kelishuv imzolanishi kutilmayotganini bildirgandi. Savdo kelishuvi Buyuk Britaniya parlamenti va Yevroparlament tomonidan tasdiqlanishi lozim.