O‘zbekistondan Yevroittifoq mamlakatlariga to‘qimachilik mahsulotlari eksporti hajmi 1,2 mlrd dollargacha yetadi

Joriy yilning 30 noyabrida Yevropa komissiyasi O‘zbekistonning preferensiyalarning umumiy tizimi plyus – «GSP+»dan foydalanuvchi maqomini olish to‘g‘risidagi arizasi bo‘yicha ijobiy qaror qabul qildi.

«GSP+» tizimi taqdim etilib, joriy qilingandan so‘ng o‘zbekistonlik ishlab chiqaruvchilar va eksportchilar o‘z mahsulotlarini Yevropa bozoriga eksport qilishda bir tomonlama tarif imtiyozlaridan foydalanishni boshlashi mumkin. O‘zbekistonlik ishlab chiqaruvchilar Yevropa ittifoqi mamlakatlariga eksport qilishi mumkin bo‘lgan tovarlar soni 6200 taga ko‘payadi.

Mutaxassislar fikriga ko‘ra, «GSP+»ga muvofiq, dastlabki bosqichda to‘qimachilik mahsulotlari eksporti hajmi 300 million AQSh dollarini tashkil etadi, keyinchalik, 2025 yilga kelib, 1,2 milliard AQSh dollarigacha o‘sishi aytilmoqda.

Hozirda O‘zbekiston 2,1 milliard dollardan ortiq to‘qimachilik mahsulotlarini eksport qilmoqda. Eksport qilinayotgan mahsulotlarning aksariyati MDH mamlakatlari, Turkiya va Xitoy bozorlariga yo‘naltiriladi. Atigi 60 million dollar Yevropa ittifoqi davlatlariga to‘g‘ri keladi.

Yevrokomissiya O‘zbekistonga «GSP+» preferensiyalar bosh tizimi benefitsiari maqomini berish to‘g‘risida muddatidan oldin qaror qabul qildi

2019 yil natijalariga ko‘ra, Yevropa Ittifoqi mamlakatlariga eksport 56,7 million dollarni tashkil etdi, joriy yilning yanvar-oktyabr oylari uchun - 62,5 million dollar.

«GSP+» tizimi joriy qilingandan so‘ng Yevropa mamlakatlaridan O‘zbekiston to‘qimachilik sanoati bilan hamkorlikka qiziqishi ortadi, «GSP+» maqomi o‘zbek to‘qimachilik mahsulotlari raqobatbardoshligini oshiradi.