07:47 / 12.12.2020
2485
11 ойда 706 миллиард сўм: Самарқанддаги мажбурий ундирувлар маълум қилинди

Мажбурий ижро бюроси Самарқанд вилоят бошқармаси бошлиғи Алишер Зокиров вилоятда ундирилган тўлов ва қарздорликлар ҳақида маълумот берди.

2020 йилнинг ўтган даврида Самарқанд вилояти бўйича ижрога қаратилган мажбурий мулкий ундирувларнинг умумий суммаси 2 трлн 230 млрд сўмни ташкил қилган.

Амалга оширилган мажбурий ижро ҳаракатлари давомида жами 1 трлн 308 млрд 659 млн сўмлик 168 минг 610 та ижро ҳужжати бўйича якуний қарорлар қабул қилинган. Ундирилган тўлов ва қарздорликлар миқдори эса 706,6 млрд сўмни ташкил қилади. Қолган 921 миллиардлик ижро ҳужжатлари бўйича ҳозирги кунда тегишли тадбирлар давом этмоқда.

Мазкур сумма мажбурий ундирув билан боғлиқ қарорлар ижросини таъминлаш, давлатга етказилган зарарларни, шу жумладан солиқ қарздорлигини, давлат божи, маъмурий ва жиноий жарималарни ундириш, жиноятлар натижасида давлат манфаатларига етказилган зарар ундирувлари натижасида юзага келган.

Хусусан, хўжалик юритувчи субъектларнинг солиқ қарздорлигини мажбурий ундириш 212,9 млрд сўмни, солиқ қарздорлиги бўйича ундирувлар 42,3 млрд сўмни ташкил этган. 

Вилоят “Матбуот уйи”да ўтказилган матбуот анжуманида таъкидланишича, маъмурий жарималар билан боғлиқ ижро ҳужжатлари сони жами ижро ҳужжатларининг 48,5 фоизини ташкил қилмоқда.

Ўтган 11 ойда бу тоифадаги 62,8 миллиард сўмлик 131 988 та ижро ҳужжатлари юзасидан тегишли тадбирлар амалга оширилиб, 39,1 миллиард сўмлик ижро таъминланган.

Анвар Мустафоқулов тайёрлади.

Top