18:34 / 12.12.2020
32373
Қозоғистон ТИВ Россия думаси депутатининг сўзлари туфайли Россияга нота топширди

Россия давлат думасининг таълим ва фан бўйича қўмитаси раиси Вячеслав Никонов Биринчи канал эфирида "Қозоғистон ҳудуди – Россиянинг энг катта совғаси" деб айтган.

Вячеслав Никонов / Фото: duma.gov.ru

Қозоғистон ташқи ишлар вазири ўринбосари Марат Сиздиков Россиянинг муваққат ишончли вакили Александр Комаров билан суҳбатда Россия давлат думаси депутати Вячеслав Никоновнинг ОАВда айтган сўзларига эътироз билдирди. Бу ҳақда Қозоғистон ТИВ матбуот хизмати хабар бермоқда.

 Хабарда айтилишича, россиялик дипломатга нота топширилган.

"Россия Федерациясининг муваққат ишончли вакили Александр Комаров Қозоғистон ташқи ишлар вазирлигига таклиф этилди. Учрашув давомида Қозоғистон ташқи ишлар вазири ўринбосари Марат Сиздиков Россия давлат думасининг таълим ва фан бўйича қўмитаси раиси Вячеслав Никоновнинг Биринчи канал эфирида "Қозоғистон ҳудуди – Россиянинг энг катта совғаси" деган сўзларига эътироз билдирди”, дейилади хабарда.

 Қайд этилишича, россиялик айрим сиёсатчиларнинг Қозоғистонга нисбатан иғвогарона сўзлари икки давлат ўртасидаги иттифоқчилик муносабатларига путур етказади.

"Қозоғистон ташқи ишлар вазирлиги бундай иддаоларга Россия томонидан муносиб баҳо берилишини кутади ва бундан буён Россия Федерацияси давлат арбобларининг бундай баёнотлар беришига йўл қўймасликка чақиради. Россиялик дипломатга Қозоғистон ТИВнинг нуқтаи назари билдирилган нота топширилди", - дейилади мамлакат ташқи ишлар вазирлиги хабарида.

Top