Messi Pelening «takrorlanmas rekordi»ni takrorladi

La Liga 14-turidan o‘rin olgan «Barselona» – «Valensiya» o‘yinida tarixiy voqea sodir bo‘ldi.

«Barselona» sardori Lionel Messi birinchi bo‘limga hakam tomonidan qo‘shib berilgan daqiqada gol urib, hisobni tenglashtirdi. Bu Messining «Barselona» safidagi 643-goliga aylandi. Shu tariqa argentinalik superyulduz bir klub safida eng ko‘p gol urish bo‘yicha afsonaviy Pele o‘rnatgan rekordni takrorladi. Pelening bu rekordi uzoq vaqt «takrorlanmas» deb atalgan.

GOAL No 6️⃣4️⃣3️⃣ ⚽

🇦🇷 Lionel Messi Equalized 🇧🇷 Pele !
Most goals for a Club #BarcaValencia

pic.twitter.com/RkSvJJRwop
— Spors Freak (@OfficialSfreak) December 19, 2020

Braziliyalik Pele «Santos» klubi safida 17 yil o‘ynab, 643 ta gol urgan. Messi «Barselona» safida 643 ta gol urishi uchun 16 yil kerak bo‘ldi. Keyingi urilgan gol bu borada Messini mutloq rekordchiga aylantiradi.

Qizig‘i, Lionel Messi tarixiy golini osonlikcha urmadi. «Barselona» – «Valensiya» o‘yini bosh hakami avvaliga Antuan Grizmannga qarshi ishlatilgan qo‘pollik uchun penalti belgiladi. Qo‘shimchasiga «ko‘rshapalaklar» sardori Xose Luis Gayya maydondan chetlatildi. Biroq hakam VAR yordamida qizil kartochkani bekor qildi, penalti esa bekor bo‘lmadi. Nuqtaga yaqinlashgan Messining penaltidan bergan zarbasini «Valensiya» posboni Xaume Domenek qaytardi. Qaytgan to‘p «Barselona» futbolchilariga borib tushdi va Xordi Albaning uzatmasidan keyin Messi bosh bilan darvozaga joylab qo‘ydi.

Messining golidan keyin «Nou Kamp» stadioni tablosida argentinalik futbolchining yubiley goliga bag‘ishlangan kollaj paydo bo‘ldi. Unda Pele Messini ko‘tarib turgani tasvirlangan va Felicitats, Messi (tabriklaymiz, Messi) deb yozilgandi.

#Messi=History pic.twitter.com/P7zpvJfqaE
— FC Barcelona (@FCBarcelona) December 19, 2020

Ma'lumot uchun, Lionel Messi 2004 yildan buyon «Barselona» safida o‘ynab keladi. U professional faoliyati davomida faqat «Barselona» safida o‘ynagan. Messi faoliyati davomida olti marta «Oltin to‘p»ni qo‘lga kiritgan va bu borada ham rekordchi. Messi, shuningdek, La Liga va «Barselona» tarixida eng ko‘p gol urgan futbolchi hisoblanadi.

#Pele #Messi