2021 йил январь ҳолатига кўра, энг қиммат палов Тошкент шаҳрида, энг арзони Наманганда тайёрланмоқда.

Фото: Uzbekistan Travel

Давлат статистика қўмитаси республиканинг марказий ҳудудларидаги ош марказларида ўтказган кузатувлари натижасида паловнинг ўртача нархлари ҳақида маълумот берди.

Палов нархларини белгилашда ҳар бир порция ва килограмм учун белгиланган ўртача нархлар асос бўлган.

2021 йилнинг январь ойи ҳолатига кўра, энг арзон тайёр палов Наманганда тайёрланмоқда. Бу ерда паловнинг бир порцияси 14,1 минг сўмдан, бир килограмми 99 минг сўмдан сотилмоқда.

Энг қиммат палов Тошкент шаҳрида. Пойтахтда паловнинг бир порцияси 18,8 минг, килограмми 131,6 минг сўмдан сотиб олиш мумкин.

2020 йил декабрь ҳолатига нисбатан, палов нархлари Хоразм вилоятида 6,5 фоизга, Самарқанд вилоятида 3 фоиз, Тошкент шаҳрида 2,4 фоизга ошган.