Rossiya albaniyalik diplomatning mamlakatdan chiqarib yuborilishini e'lon qildi

Rossiya Albaniyaning Moskvadagi elchixonasi birinchi kotibi Yonida Droguni persona non grata deb e'lon qildi.  Bu haqda Rossiya tashqi ishlar vazirligi saytida ma'lum qilindi.

Albaniyalik diplomat mamlakatni 72 soat ichida tark etishi lozim. Rossiya tashqi ishlar vazirligining bildirishicha, bu Rossiyaning Tiranadagi elchixonasi birinchi kotibining Albaniyadan chiqarib yuborilishiga nisbatan javob chorasidir.

«Albaniya tomonining harakatlarini mamlakatda boshlangan saylov kampaniyasi sharoitida siyosiy ochko yig‘ish, G‘arbdagi Rossiyaga qarshi kuchlarning aytganini qilish va ularning qo‘llab-quvvatlashiga erishish maqsadidagi ig‘vogarlik deb bilamiz», — deyiladi Rossiya TIV bayonotida.

Rossiya avvalroq Aleksey Navalniyni qo‘llab-quvvatlash uchun o‘tkazilgan mitingda qatnashgani sababli Germaniya, Polsha va Shvetsiyaning uch nafar diplomatini mamlakatdan chiqarib yuborishini e'lon qilgandi.