17:43 / 18.02.2021
16642
Президент: «Олдин йилига 2 млрд доллар тўғридан тўғри инвестиция киритилди, дейиларди. Лекин у ёлғон эди»

Наманган вилоятига ташрифини давом эттираётган президент Шавкат Мирзиёев мамлакатга киритилаётган инвестициялар кўпаяётгани ҳақида гапирди, дея хабар бермоқда Kun.uz мухбири.

«Олдин "республика бўйича йилига 2 млрд доллар тўғридан тўғри инвестиция киритилди", деб ҳисобот бериларди. Лекин у ҳам ёлғон эди. Ҳозир Наманган вилоятининг ўзи йилига 2 млрд доллардан кўпроқ инвестиция жалб қиляпти.

Биз ҳар бир инвесторни қўллаб-қувватлаяпмиз. Улар ҳам тушуниши керак, қайси бири тезроқ Ўзбекистонга кирса, кенгроқ имкониятга эга бўлади», – деди президент.

Давлат раҳбари 3 миллион доллар тўғридан тўғри хорижий инвестиция ҳисобига 108 гектар майдонда интенсив боғ барпо этган «Sura General Invesments» МЧЖ хорижий корхонаси раҳбари Абдулборий Айман билан суҳбатлашди ва унга катта ишонч билдирди.

«Ҳозир БААлик инвесторлар сизни кузатиб туришибди. Чунки бизнинг чорловимизга қараганда сизнинг тавсияларингиз уларга кўпроқ таъсир қилади», – деди Шавкат Мирзиёев Абдулборий Айманга.

Бунга жавобан араб инвестори фаолиятини кенгайтириш ниятида эканини маълум қилди.

k9vlo3Hdz6Rr-GPB7sehNT7SafThhztn.jpg (1000×666)

«Яқинда бир гуруҳ дўстларим Ўзбекистонга келишади, мен уларга бу давлатнинг кенг имкониятларини кўрсатиб бермоқчиман. Бизнесимизни фақат қишлоқ хўжалиги билан чеклаб қўймоқчи эмасмиз», – деди Айман.

Top