15:48 / 22.02.2021
1632
Япония ҳукумати коронавирусга қарши эмлаш учун вакцина етишмаётганини маълум қилди

Японияда эмлаш кампанияси ўтган ҳафтада бошланганди. Бош вазир Ёсихидэ Суганинг маълум қилишича, биринчи навбатда тиббиёт ходимлари эмланади. 

Фото: Mehri/Pool Photo via AP

Японияда Pfizer вакцинаси етишмаслиги сабабли кекса ёшдагиларни эмлаш аввал режалаштирилганидан кўра секинроқ амалга ошади. Бу ҳақда маъмурий ислоҳотлар вазири Таро Коно маълум қилди, деб хабар берди Kyodo агентлиги.

Вазирнинг билдиришича, Pfizer компанияси қўшимча ишлаб чиқариш қувватларини ўрнатаётганлиги сабабли май ойига қадар вакцина чекланган миқдорда етказиб берилади. Шу сабабли эмлаш мамлакатнинг айрим ҳудудларида ва маълум бир ёш гуруҳлари учун ўтказилади.

Японияда эмлаш кампанияси ўтган ҳафтада бошланганди. Бош вазир Ёсихидэ Суганинг маълум қилишича, биринчи навбатда тиббиёт ходимлари эмланади. 

Вазирлар маҳкамасининг бош котиби Кацунобу Катонинг сўзларига кўра, агарда махсус шприцлар етарлича миқдорда сотиб олинмаса Pfizer вакцинасининг бир қисмини ташлаб юборишга тўғри келади.

Битта ампулада олти доза вакцина бўлади. Оддий шприц ёрдамида беш доза вакцина тортиб олинади, олтинчи дозани эса фақат махсус шприц ёрдамида тортиб олиш мумкин. 

Top