11:20 / 08.03.2021
6130
Тошкентда иккита «Кобальт» тўқнашиши оқибатида 4 киши жароҳат олди

Жорий йилнинг 7 март куни соат 23:55ларда “102” тизимига келиб тушган хабарга кўра, Тошкент шаҳар, Яккасарой тумани, Шота Руставели кўчасида ҳайдовчи, 1993 йилда туғилган О.Б. “Кобальт” русумли автомобилда ҳаракатланаётган вақтда бошқарувни йўқотиб, қарама-қарши йўналишга ўтиб кетган ва симёғочга урилган.

ИИВ ЙҲХББ ахборот хизмати хабарига кўра, у ўз йўлида ҳаракатланиб келаётган ҳайдовчи, 1955 йилда туғилган А.Ш. бошқарувида бўлган яна бир “Кобальт” русумли автомобил билан тўқнашган.

Натижада, ҳайдовчи О.Б. бошқарувидаги “Кобальт” русумли автомобил йўловчилари, 29 ёшли Ш.Э., 30 ёшли С.Ю., бошқа бир “Кобальт” ҳайдовчиси А.Ш., унинг бошқарувида бўлган автомобил йўловчиси, 27 ёшли В.Ш.га биринчи тез тиббий ёрдам кўрсатилган.

Мазкур тўқнашув юзасидан Тошкент шаҳар ИИББ ЙҲХБ томонидан суриштирув ишлари олиб борилмоқда.

“Барча ҳайдовчилардан белгиланган қоидаларга амал қилишни, қоидаларни четлаб ўтиб ўзи ва ўзгалар саломатлигини хавф остига қўймасликни сўраб қоламиз”, дейилади маълумотда.

Top