2021 yil oxirida Qashqadaryoda yiliga 1.2 mln tonna sement ishlab chiqaradigan zavod ishga tushadi - Zoyir Mirzayev

Qashqadaryo viloyati hokimi Zoyir Mirzayev o‘z taqdimotida viloyatda rivojlanishda oqsayotgan sohalar va ularning yechimi borasida olib borilayotgan ishlar to‘g‘risida ma'lumot berdi.

«Qashqadaryoda bir qancha qurilish mahsulotlariga talab yuqori, lekin viloyatda shu vaqtgacha ularning ko‘pi ishlab chiqarilmay kelmoqda. Masalan, sement (105 ming tonna), gipsokarton (106.8 ming tonna), kafel (102 ming kv/metr) kabi mahsulotlarga ehtiyoj katta bo‘lgani holda, Qashqadaryoda umuman ishlab chiqarilmayapti. Hattoki temir-betonni ham ishlab chiqarib, viloyat o‘zini to‘liq qoplolmay kelmoqda.

Respublika davlat Geologiya qo‘mitasi Qashqadaryoda 261.3 mln tonna sement xomashyosi zaxirasi borligini aniqlab berdi. 2021 yil oxirida yiliga 1.2 mln tonna sement ishlab chiqaradigan zavodni ishga tushirishni reja qilib turibmiz.

Shuningdek, qishloq xo‘jaligi mahsulotlarini qayta ishlash borasida ham ancha orqada ekanimizni tahlillar ko‘rsatib berdi. Viloyatda jami 658.7 ming tonna meva-sabzavot yetishtiriladi, lekin uning bor-yo‘g‘i 15.9 foizigina qayta ishlanadi. Respublikada eng ko‘p 172.4 ming tonna go‘sht yetishtirsa-da, atigi 6.4 foizini qayta ishlaydi», – deya qayd etib o‘tgan Qashqadaryo viloyati hokimi.