Eron marhum yadrochi olim sharafiga nomlangan vaksinasini odamlarda sinashni boshladi

Eron koronavirusga qarshi ishlab chiqqan o‘z vaksinasini 16 martdan odamlarda sinashni boshladi. Vaksina 2020 yil noyabr oxirida o‘ldirilgan eronlik yadrochi olim Muhsin Faxrizoda sharafiga “Faxra” deb nomlandi. Marhum olimning o‘g‘li birinchilardan bo‘lib vaksina bilan emlandi.

Ma'lum qilinishicha, bungacha vaksina 650dan ko‘proq hayvonda, jumladan, sichqonlar, quyonlar va maymunlarda sinovdan o‘tkazilgan. 

“Faxra” vaksinasining hayvonlarda o‘tkazilgan sinovlari uning samarador ekanini ko‘rsatdi va bugundan u odamlarda sinala boshlanadi”, deb e'lon qilgan Eron sog‘liqni saqlash vaziri Said Namakiy.

Vaksinani ishlab chiqish bo‘yicha loyiha rahbari Ahmad Karimiyning ta'kidlashicha, ushbu vositaning ommaviy ishlab chiqarilishi yozdayoq boshlanishi mumkin. 

Fevral oxirida Eronda Razi Cov Pars mahalliy vaksinasining klinik sinovlari boshlangani ma'lum qilingandi. Undan ham avvalroq Eronning koronavirusga qarshi birinchi vaksinasi COVIRAN Bereket klinik sinovlarining 1-bosqichi yakunlangani ma'lum qilingan.