Kartoshka ekiladigan maydonlarga 58,5 ming tonna urug‘lik kartoshka yetishmayapti - «O‘zagroinspeksiya»

Bu haqda Kun.uz’ga Vazirlar Mahkamasi huzuridagi «O‘zagroinspeksiya» axborot xizmati rahbari Xolida Shodiyeva ma'lum qildi.

Shuningdek, uning ma'lumot berishicha, bog‘-tok qator oralariga 65,1 ming gektar maydonga sabzavot, 8,2 ming gektar maydonga poliz va 2,9 ming gektar maydonga kartoshka ekish ko‘zda tutilgan.

Xolida Shodiyevaning aytishicha, inspeksiya tomonidan 2021 yil hosili uchun asosiy va bog‘-tok qator oralariga ekiladigan ekinlarning joylashtirilishi hamda talab etiladigan, mavjud va yetishmaydigan urug‘liklar borasida o‘rganishlar o‘tkazilgan.

«O‘rganish natijalariga ko‘ra, bugungi kunda asosiy va bog‘-tok qator oralariga ekiladigan sabzavot urug‘liklarining 14 ming 477 tonnasi hamda poliz urug‘liklarining 70,4 ming tonnasi mavjud ekanligi ma'lum bo‘ldi.

Shuningdek, joriy yilda 53,6 ming gektar kartoshka ekiladigan maydonlarga 188 ming tonna urug‘lik kartoshka talab etilib, bugungi kunda 58,5 ming tonna urug‘lik kartoshka yetishmasligi aniqlangan», – dedi u.

Ta'kidlanishicha, hozirda inspeksiyaning hududiy boshqarmalari tomonidan 2021 yil hosili uchun ekiladigan maydonlarda yetishmaydigan ekinlarning urug‘liklari to‘g‘risidagi ma'lumotlarni xokimliklarga yetkazish, urug‘liklarning davlat standarti talablari doirasida saqlanishi, fermer xo‘jaliklari va qishloq xo‘jaligi korxonalariga o‘z vaqtida sifatli yetkazib berilishi bo‘yicha ishlar olib borilmoqda.