Pfizer yosh bolalarda koronavirusga qarshi vaksina sinovini o‘tkazishni boshladi 

Pfizer va BioNTech 12 yoshdan kichik bolalarda koronavirusga qarshi vaksinasi sinovini o‘tkazishni boshladi.

Xabar qilinishicha, klinik sinovlarning birinchi bosqichida 6 oylikdan 11 yoshgacha bo‘lgan 144 nafar bola qatnashadi. Sinovlarning barcha bosqichlarida esa AQSh va Yevropadan jami 4,5 ming nafar bola ishtirok etadi.

Klinik sinovlar natijalari yilning ikkinchi yarmida tayyor bo‘lishi mo‘ljallangan.

Avvalroq Moderna va AstraZeneca kompaniyalari bolalar hamda o‘smirlarda koronavirusga qarshi vaksina sinovlarini boshlagandi, yaqin kunlarda Johnson & Johnson kompaniyasi ham sinovlarni boshlashi kutilmoqda.

Pfizer 12-15 yoshli o‘smirlarda vaksina sinovini avvalroq boshlagan bo‘lib, sinovning dastlabki natijalari yaqin haftalarda taqdim etiladi.