Indoneziya va Sharqiy Timordagi yomon ob-havo 100 dan ortiq kishining o‘limiga sabab bo‘ldi

Reuters axborot agentligining xabar berishicha, Indoneziyaning janubiy qismida tabiiy ofat oqibatida halok bo‘lganlar soni 86 kishiga yetgan, yana 71 kishi bedarak yo‘qolgan. Umumiy hisobda tabiiy ofatdan 30 ming indoneziyalik jabr ko‘rgan. 

Bundan tashqari, tabiiy ofat hududida 5ta ko‘prik qulab tushgan va ko‘plab yo‘llar qo‘porilib tushgan daraxtlar bilan to‘silib qolgan. Bu esa qutqaruv amaliyotini o‘tkazishni qiyinlashtirmoqda.  

Indoneziya prezidenti Joko Vidodo jabrlanganlarga o‘z hamdardligini bildirgan va aholiga yomon ob-havo sharoitlarida rasmiy shaxslar ko‘rsatmalariga amal qilishni tavsiya qilgan. 

Tabiiy ofat, shuningdek, qo‘shni Sharqiy Timorda 27 kishining hayotiga zomin bo‘lgan. 7 mingga yaqin odam o‘z uyini tark etishga majbur bo‘lgan.  

Ikki davlat hududidagi toshqinlar 4 aprelga o‘tar kechasi boshlangan. Uning oqibatida yuzlab uylar suv stida qolgan.

Prognozlarga ko‘ra, yaqin kunlarda yog‘ingarchilik va shamol yanada kuchayishi mumkin.