Toshkentda uy devorlarida giyohvand vositalar reklamasi yozuvlarini qoldirgan fuqarolar shaxsi aniqlandi

Ijtimoiy tarmoqlarda Toshkent shahridagi turar joylar devorlarida giyohvandlik vositalari reklamasi yozuvlari paydo bo‘layotgani haqida xabar tarqaldi. Poytaxt IIBB mazkur holat bo‘yicha rasmiy ma'lumot berdi.

Toshkent shahar IIBB xodimlari tomonidan o‘tkazilgan tekshiruv davomida aniqlanishicha, Mirzo Ulug‘bek tumani “Bo‘z” mahallasida bir nechta uylar devorlarida yozuvlar paydo bo‘lgan. Aholi orasida o‘tkazilgan so‘rov natijasida yozuvlar 5-6 kun oldin paydo bo‘lgani aniqlangan.

Tekshiruv natijasida mazkur yozuvlarni qoldirgan fuqarolar – 18 yoshli B.I. va 21 yoshli I.V.ning shaxslari aniqlandi.

Suhbat davomida B.I. joriy yilning mart oyida obuna bo‘lgan “Telegram” kanalda ish haqida e'lon chiqqanini ma'lum qilgan. B.I. noma'lum shaxs bilan telefon orqali bog‘lanib, undan haq evaziga uylarning devorlarida qoldirish kerak bo‘lgan yozuv matnini olgan. Shundan so‘ng B.I. tanishi I.V. bilan linoleumdan e'lon matnini qirqib, bo‘yoq ballonchasi yordamida uylarning devorlarida yozuv qoldirishgan.

Mazkur fakt bo‘yicha tekshiruv ishlari davom etmoqda, deyiladi ma'lumotda.