11 aprelda bir necha davlatda prezident saylovlari bo‘lib o‘tadi 

11 aprelda Ekvador va Afrikaning ikki davlati – Chad va Beninda prezident saylovlari bo‘lib o‘tadi.  

Ekvadordagi saylovlar 

Ekvadorda prezident saylovlarining 2-bosqichi bo‘lib o‘tadi. 13 mlndan ko‘proq ekvadorliklar saylov uchastkalariga kelib, 1-bosqich g‘oliblari – «Umid uchun ittifoq» koalitsiyasi nomzodi Andres Araus va sobiq bankir, «KReO harakati» vakili Gilermo Lassodan birini tanlashi kerak bo‘ladi.

Eng ko‘p ovoz to‘plagan nomzod mamlakatning yangi prezidenti bo‘ladi va 24 maydan o‘z lavozimini bajarishga kirishadi. Ekvador prezidenti 4 yillik muddatga saylanadi. 

Jamoatchilik fikrini o‘rganish bo‘yicha o‘tkazilgan so‘rovnomalar natijalarining ko‘rsatishicha, birorta nomzod 2-bosqichning yaqqol favoriti hisoblanmaydi.  

Saylovlarning 7 fevralda o‘tgan 1-bosqichida Araus 37,7 foiz ovoz bilan g‘alaba qozongan. 

Mamlakatning amaldagi prezidenti Lenin Moreno saylovlarda ishtirok etmaslikka qaror qilgan.

Benindagi saylovlar 

Afrikaning Benin davlatida ham 11 aprel kuni prezident saylovlari bo‘lib o‘tadi. Saylovlar avvalroq hukumatga qarshi o‘tgan namoyishlar ortida tarang muhitda o‘tishi kutilmoqda. 

Prezident saylovlarida 3 nomzod, jumladan, amaldagi prezident Patris Talon ishtirok etadi. 62 yoshli Talon ikkinchi muddatga qayta saylanishi mumkin. Uning o‘zi saylovlarning 1-bosqichidayoq g‘alaba qozonishiga ishonmoqda.  

Talonga parlamentning sobiq deputatlari — Alassana Sumanu va Korentin Koxue raqobatchilik qiladi. 

Ta'kidlab o‘tish joiz, 2016 yilda hokimiyat tepasiga kelgan Talon mamlakatda bir qator yirik iqtisodiy islohotlarni amalga oshirgan. Ular Afrika davlatida ishbilarmonlik iqlimi yaxshilanishiga va davlat moliyasi jipslashuviga olib kelgan.  

Agar nomzodlardan birortasi 50 foizdan ko‘proq ovoz to‘play olmasa, unda saylovlarning 2-bosqichi bo‘lib o‘tadi. 

Benin dunyoning eng nochor davlatlaridan biri hisoblanadi. Mamlakatning 38 foiz aholisi nochorlikda hayot kechiradi. Mamlakat iqtisodiyotining asosiy tarmog‘i qishloq xo‘jaligi va birinchi navbatda paxta yetishtirish hisoblanadi.   

Chaddagi saylovlar  

11 aprelda Afrikaning yana bir nochor davlatlaridan biri – Chadda ham prezident saylovlari o‘tkaziladi. 

Prezident lavozimi uchun 7 nomzod, jumladan, mamlakatni 30 yildan ko‘proq vaqtdan beri boshqarib kelayotgan amaldagi prezident, 68 yoshli Idriss Debi Itno ham ishtirok etadi. Mamlakatda ovoz berish huquqiga 7,4 mlndan ko‘proq kishi ega.  

Idriss Debi Itno uchun ushbu saylovlar 1990 yil oxirida davlat to‘ntaruvi natijasida hokimiyat tepasiga kelgandan buyon oltinchisi hisoblanadi. 2018 yilda mamlakatning yangi konstitutsiyasi qabul qilinib, u prezident hokimiyatini yanada mustahkamlagan. Shu bilan birga, prezident vakoltlari ikkita 6 yillik muddat bilan cheklangan. Yangi konstitutsiya amaldagi prezidentga uning avvalgi muddatlari hisobga olinmagan holda, 2033 yilgacha saylanish imkonini beradi.  

Ta'kidlab o‘tish joiz, Chad tarixida ilk bor prezident lavozimi uchun ayol kishi kurash olib boradi.  

Agar nomzodlardan birortasi yetarli ovoz to‘play olmasa, 23 may kuni saylovlarning 2-bosqichi bo‘lib o‘tadi. 

16,4 mln kishilik Chad Afrikaning eng nochor davlatlaridan biri sanaladi. Jahon banki ma'lumotlariga ko‘ra, mamlakatning 42 foiz aholisi nochorlikda yashaydi. Mamlakat nochorlikdan tashqari, xalqaro terrorchilikdan aziyat chekib keladi.     

Chad ko‘li atrofida «G‘arbiy Afrikada IShID» terrorchi guruhi harakat qiladi. Terrorchilarning asosiy bazalari Chad ko‘lining janubiy va janubi-g‘arbiy qismi – Nigeriya, Chad, Kamerun va Niger chegaralari tutashadigan hududda joylashgan.