Yuridik shaxslarga jarima qo‘llash tartibi o‘zgaradi

O‘zbekistonda yuridik shaxslarga moliyaviy jarima qo‘llash tartibi o‘zgarishi mumkin. Yangi qonun loyihasiga ko‘ra, jarimalarni qo‘llashning yagona huquqiy mexanizmi joriy etilib, tadbirkorlar uchun qator kafolatlar belgilanmoqda.

Hujjatda moliyaviy jarima yuridik shaxslar tomonidan qonunchilik talablari buzilganda qo‘llaniladigan moliyaviy-huquqiy ta’sir chorasi sifatida belgilangan. Qonun davlat organlariga jarima qo‘llashda qonuniylik, mutanosiblik, oshkoralik va ikki karra jazolashga yo‘l qo‘ymaslik prinsiplariga amal qilish majburiyatini yuklaydi.

Loyihaga ko‘ra, moliyaviy jarimalar:

— qat’iy pul summasida;
— bazaviy hisoblash miqdoriga nisbatan;
— tushum yoki zarar miqdoridan foiz hisobida belgilanishi mumkin.

Shuningdek, birinchi marta sodir etilgan va katta zarar keltirmagan ayrim huquqbuzarliklar uchun jarima o‘rniga ogohlantirish berilishi nazarda tutilgan. Agar tadbirkor kamchiliklarni ixtiyoriy bartaraf etsa, unga moliyaviy jarima qo‘llanmasligi mumkin.

Qonun loyihasida tadbirkorlarga qaror ustidan sudga yoki yuqori turuvchi organga shikoyat qilish huquqi ham berilmoqda. Bundan tashqari, barcha moliyaviy jarimalar “Yagona davlat nazorati” axborot tizimidagi elektron reyestrga kiritilishi belgilangan.

Hujjatda noqonuniy yoki asossiz qo‘llangan jarimalar bekor qilinishi va to‘langan mablag‘lar tadbirkorga qaytarilishi ham nazarda tutilgan.