Bog‘otlik tadbirkor qizilmiyani Germaniyaga eksport qilmoqda

Korxona asoschisi, 31 yoshli tadbirkor Bekzod O‘rinov faoliyatini qanday yo‘lga qo‘ygani haqida so‘zlab berdi. 

«Maktabni tamomlab, 2009 yilda Toshkent farmatsevtika institutiga o‘qishga kirdim. Talabalik davrimda farmatsevtika sohasiga oid bo‘lgani sababli, qizilmiya ildizini qayta ishlash zavodida mehnat qildim. 2014 yilda institutni tamomlagach, Xorazmga qaytib keldim. Shunda qizilmiya ildizini zavodlarga yetkazib berish g‘oyasi paydo bo‘ldi. 2014 yilda «Bog‘ot master» oilaviy korxonasini ochdim». 

Qizilmiya – ko‘p yillik dorivor o‘simlik bo‘lib, O‘rta Osiyoda, jumladan Xorazmda ham yovvoyi holda keng tarqalgan. 

«Qizilmiya ko‘p yillik o‘simlik hisoblanadi va O‘rta Osiyoda keng tarqalgan. U yovvoyi holda o‘sadi. Korxonamiz fermer xo‘jaliklari bilan shartnoma imzolagan. Biz fermerlarning yerlarini yovvoyi, begona o‘tlardan tozalab beramiz. Jumladan, qizilmiyaning ildizini ham terib olamiz. 

Qizilmiya ildizi asosan tibbiyotda, oziq-ovqat sanoati va parfyumeriya sohasida ishlatiladi. Uning tarkibida glitsirrizin kislotasi bo‘lib, glyukoza, saxaroza va qanddan 50 barobar kuchli shira hisoblanadi. Bu kislota jigar kasalliklariga qarshi, immunitet ko‘taruvchi va balg‘am qochiruvchi dori-darmon olishda ishlatiladi». 

Korxonada qizilmiya qo‘l mehnati yordamida bir necha bosqichlardan o‘tadi. 

«Qizilmiya ildizi qo‘l mehnati yordamida bir necha bosqichlardan o‘tadi: navlarga ajratiladi, yuviladi, quritiladi. So‘ngra 5-8 sm kattalikda kesiladi, qadoqlanadi. 

Oilaviy korxonamizda 30 ishchi mehnat qiladi. Ular uchun barcha sharoitlar yaratilgan. Kuniga 1 mahal issiq ovqat bilan ta'minlaymiz. Ish haqi ishbay usulda to‘lanadi. Ishchilar qilgan mehnatiga yarasha 1 – 1,5 mln so‘m maosh olishadi». 

Korxona 3 yil davomida O‘zbekistondagi farmatsevtika zavodlariga qizilmiya ildizini yetkazib bergan. So‘ngra xalqaro bozorga chiqqan. 

«2017 yildan boshlab, qizilmiya ildizini eksport qilishni boshladik. Dastlab Myanma davlatiga 4 konteyner mahsulotni jo‘natdik. 2018 yildan boshlab, Germaniya bilan hamkorlik qilmoqdamiz». 

Korxona kelgusida faoliyatini kengaytirib, qizilmiya ildizini qayta ishlashni yo‘lga qo‘yishni rejalashtirmoqda. 

«Bog‘ot tumani hokimligi tomonidan bizga yer ajratildi. Shu yerda qizilmiyani plantatsiya usulida o‘stirib, ildizini olishni maqsad qilganmiz. 

Bundan tashqari, yil oxirida Xitoy texnologiyalari yordamida qizilmiyadan glitsirrizin kislotasini kukun shaklida oluvchi sexni ishga tushirishni ham rejalashtirganmiz», - dedi Bekzod O‘rinov. 

Nurmuhammad Said