Rossiya AQSh elchixonasi matbuot kotibini mamlakatdan chiqarib yuboradi

Rossiyani tark etishi kerak bo‘lgan AQSh elchixonasi xodimlari orasida elchixona matbuot kotibi Rebekka Ross ham bor, deb yozadi «Kommersant'». Ro‘yxatda jami o‘n kishining nomi qayd etilgan.

Gazeta manbasining so‘zlariga ko‘ra, Ross AQSh «diplomatik missiya matbuot kotibini Vashingtonga kiritmagani uchun» ro‘yxatga kiritilgan.

«AQSh bu inson viza olish uchun bergan hujjatlarni hattoki rad etish sababini aytmasdan qaytarib berdi. Shunday ekan, bu Rossiyaning tashabbusi emas», — degan nashr manbasi.

AQSh 15 aprelda Rossiyaga qarshi yangi sanksiyalar doirasida Rossiya elchixonasining o‘n nafar xodimini mamlakatdan chiqarib yuborishini e'lon qilgandi.

21 aprel kuni Rossiya tashqi ishlar vazirligi o‘n nafar amerikalik diplomatni persona non grata deb e'lon qildi va ular bir oy ichida mamlakatni tark etishi shartligini bildirdi.