Qashqadaryoda portlagan «Nexia»da aka-ukalar vafot etgan

Qashqadaryo viloyat IIB Axborot xizmati habariga ko‘ra, bugun, 22 may kuni Chiroqchi tuman «Navoiy» MFY Terakzor ko‘chasidan o‘tgan yo‘lda tumanning «Qumdaryo» MFY Oqtunli qishlog‘ida yashagan B.J., uning otasi E.M.ga tegishli bo‘lgan «Nexia-1» rusumli avtomashinasini boshqarib ketayotgan vaqtda kuchli portlash sodir bo‘lgan.

Natijada «Nexia-1» avtomashina haydovchisi B.J. va avtomobil salonida yo‘lovchi sifatida ketayotgan uning ukasi X.J. voqea joyida vafot etganlar.

Shuningdek, avtomashinada yo‘lovchi sifatida ketayotgan qishloqdoshi A.S. og‘ir tan jarohati olib tuman tez tibbiy yordam bo‘limiga tushgan.

Mazkur holat yuzasidan 22.05.2021 yilda Chiroqchi tumani IIO FMB huzuridagi Tergov bo‘limi tomonidan holat yuzasidan Jinoyat kodeksining 262-moddasi 3-qismi «a» bandi bilan jinoyat ishi qo‘zg‘atilib, ayni vaqtda dastlabki tergov harakatlari olib borilmoqda.