12:12 / 06.06.2021
5645
Яманда АЁҚШга ракета тегиши оқибатида 16 киши ҳалок бўлди
Фото: Reuters

Яманнинг нефтга бой Мариб вилоятида АЁҚШга ракета тегиши оқибатида камида 16 киши, жумладан, болалар ҳалок бўлди. Ҳукумат ракета зарбасида ҳусийларни айбламоқда.

“Ҳусийлар учирган ракета АЁҚШга тушди ва кучли портлашларга олиб келди”, деб маълум қилган ҳукуматдаги манба.

Портлашлар ортидан чиққан ёнғинда бир неча автомобил олов ичида қолган. Бир неча ўнлаб одамлар турли оғирликдаги куйиш жароҳатлари билан шифохонага етказилган. Қурбонлар орасида 5 бола бор.  

Таъкидланишича, ҳусийлар февралда Мариб вилоятини эгаллаб олиш мақсадида ҳукумат армиясига қарши йирик амалиётни бошлаган.

Ямандаги ўзаро қарама-қарши томонлар ўртасида БМТ томонидан яқинда ташкил этилган музокаралар эса самарасиз якунланган.

Яманда 2014 йил охиридан бери фуқаролик уруши давом этиб келмоқда. Унда пойтахт Сано ва мамлакатнинг шимолий ҳудудларини эгаллаб олган ҳусийлар ҳамда Саудия Арабистони ва БАА томонидан қўллаб-қувватланувчи ҳукумат қўшинлари ўзаро курашмоқда.

Top