Qirg‘izistonda koronavirusning uchinchi to‘lqini boshlangani ma'lum qilindi

Qirg‘izistonda koronavirus infeksiyasining uchinchi to‘lqini kechmoqda. Bu haqda mamlakat sog‘liqni saqlash vaziri o‘rinbosari Jaloliddin Rahmatullayev ma'lum qildi.

"Pandemiya boshlanganidan buyon koronavirus infeksiyasining ikkita epidemiologik o‘sishi kuzatildi: 2020 yil iyuli va noyabrida. Bugungi kunda kasallanishning uchinchi to‘lqini kuzatilmoqda", - dedi u.

Rahmatullayevning so‘zlariga ko‘ra, mamlakat sog‘liqni saqlash vazirligi kasallanishlar soni o‘sishiga tayyor.

Qirg‘izistonda koronavirus yuqtirish bilan bog‘liq dastlabki holatlar o‘tgan yil martida qayd etilgandi. Hozirga kelib kasallik yuqtirganlar soni 111 mingdan oshgan, 1,9 mingdan ortiq bemor vafot etgan.