08:39 / 20.06.2021
25072
Шимолий Корея: озиқ-овқат танқислиги ва АҚШ билан муносабатлар

Шимолий Корея раҳбари Ким Чен Ин мамлакат АҚШ билан ҳам мулоқотга, ҳам зиддиятга тайёр бўлиши лозимлигини айтди. «Биз, айниқса, қарама-қаршиликларга тўлиқ тайёр туришимиз керак», деди Ким.

Фото: EPA

Қайд этиш жоиз, авваллари Ким Чен Ин томонидан Жо Байден маъмурияти билан боғлиқ муносабатлар борасида бундай баёнот берилмаган.

«Давлатимиз шарафини ва мустақил ривожланиш манфаатларини ҳимоя қилиш, тинч муҳит ва Шимолий Кореянинг хавфсизлигини таъминлаш зарур», деди Ким пойтахт Пхенянда бўлиб ўтган Шимолий Корея ишчилар партияси Марказий қўмитаси йиғилишида қилган нутқида.

Ким Шимолий Корея воқеаларнинг ҳар қандай ривожига «дарҳол ва аниқ» жавоб беришини, шунингдек, ўз «диққат-эътиборини Корея ярим оролидаги вазиятни барқарор назорат қилишни таъминлаш»га қаратишини таъкидлади.

Шимолий Корея раҳбари аввалги нутқида мамлакат озиқ-овқат танқислигига дуч келаётганини айтган эди.

Озиқ-овқат танқислиги: 1 килограмм банан 45 доллар

Шимолий Корея раҳбари Ким Чен Ин Меҳнат партияси марказий қўмитаси аъзолари билан учрашувда мамлакатда озиқ-овқат танқислиги мавжудлигини тан олди.

Ким қўмита аъзоларига мурожаат қилиб, ўтган йили тошқинларни келтириб чиқарган тўфонлар туфайли қишлоқ хўжалиги сектори ғалла етиштириш кўрсаткичларига эриша олмаганини айтди.

Мамлакатда озиқ-овқат маҳсулотлари нархи тез суръатлар билан ўсиб бормоқда.

Шимолий Корея янгиликларини 2010 йилдан бери хориждан (АҚШ, Европа Иттифоқи ва Жанубий Кореядан) кузатиб борган NK News нашри мамлакатда 1 килограмм банан 45 долларга сотилаётгани ҳақида хабар тарқатди.

Шимолий Корея коронавирус тарқалишига барҳам бериш учун ўз чегараларини ёпганди. Натижада, мамлакатнинг Хитой билан савдоси тўхтаб қолди.

Шимолий Корея озиқ-овқат, ўғит ва ёнилғида Хитойга қарам.

Айни пайтда Шимолий Корея ядровий фаолиятига қўйилган халқаро эмбаргодан ҳам азият чекмоқда.

«Машаққатли йўл»

Апрель ойида Ким Чен Ин аввалги нутқларига сира ўхшамайдиган маърузасида машаққатлар ҳақида гапирганди. «Одамлар дуч келадиган қийинчиликларни бироз бўлса-да енгиллатиш учун» расмийлар «бир-бирларини янада машаққатли юришга ундаши» кераклигини таъкидлаганди. 

«Оғир сафар» тушунчаси илгари ҳам Шимолий Корея тарихида қўлланган.

90-йилларда советлар иттифоқи қулаши натижасида Шимолий Кореяга ҳаётий жиҳатдан ниҳоятда муҳим бўлган ташқи ёрдам узилиб қолиши ортидан мамлакатда юзага келган очликка қарши курашиш жараёнига шундай ном берилган эди.

Ўша пайтда очликдан вафот этган шимолий кореяликларнинг сони ҳали ҳам аниқ эмас, аммо тахминларга кўра, бу рақам 3 миллионга етган.

АҚШ билан муносабатлар

АҚШ президенти Жо Байден ўз сайловолди кампаниясида Кимни «қароқчи» деб атаганди. Байденнинг инаугурациясидан бир неча кун олдин Шимолий Корея улкан ҳарбий парад ўтказган ва унда янги ракета намойиш қилинганди.

Шимолий Корея Байден томонидан мамлакатни «глобал хавфсизликка жиддий таҳдид» сифатида тавсифланганига ҳам ўз муносабатини билдирди.

АҚШ эса Корея ярим оролини тўлиқ ядросизлантириш бўйича олиб борилаётган ҳаракатларни давом эттиришини эълон қилди.

«Бизнинг сиёсатимиз катта бир савдолашишга қаратилмайди. Шунингдек, у стратегик сабрга ҳам таянмайди», деди Оқ уй вакили Жен Псаки.

Псакининг айтишича, АҚШ «дипломатик воситаларни синаб кўришда ҳам ўлчовли ва амалий ёндашувни қўллайди».

Ким Трамп билан уч марта учрашганди

Ким Чен Ин Байдендан олдинги президент Дональд Трамп билан уч марта учрашган, аммо бир мунча вақт ўтгач, ядровий қуролсизланиш бўйича музокаралар тўхтаганди.

«Байден маъмурияти тўп Шимолий Кореяда эканлигини айтди», дейди Сеулдаги Ихва аёллар университети халқаро алоқалар бўйича мутахассиси Лейф-Эрик Исли. Унинг таъкидлашича, Шимолий Корея ўз эътиборини ички сиёсатга қаратмоқда ва Вашингтон томонидан янада катта рағбат кўришни хоҳламоқда. «Пхенян музокараларга пандемиядан кейинги иқтисодиёти кучайганини намойиш этиб, баъзи таҳдидкор ҳарбий синовларни кўрсатгандан кейингина қайтиши мумкин», дейди у.

Top