Shimoliy Koreya rahbari Kim Chen In mamlakat AQSh bilan ham muloqotga, ham ziddiyatga tayyor bo‘lishi lozimligini aytdi. «Biz, ayniqsa, qarama-qarshiliklarga to‘liq tayyor turishimiz kerak», dedi Kim.
Qayd etish joiz, avvallari Kim Chen In tomonidan Jo Bayden ma'muriyati bilan bog‘liq munosabatlar borasida bunday bayonot berilmagan.
«Davlatimiz sharafini va mustaqil rivojlanish manfaatlarini himoya qilish, tinch muhit va Shimoliy Koreyaning xavfsizligini ta'minlash zarur», dedi Kim poytaxt Pxenyanda bo‘lib o‘tgan Shimoliy Koreya ishchilar partiyasi Markaziy qo‘mitasi yig‘ilishida qilgan nutqida.
Kim Shimoliy Koreya voqealarning har qanday rivojiga «darhol va aniq» javob berishini, shuningdek, o‘z «diqqat-eʼtiborini Koreya yarim orolidagi vaziyatni barqaror nazorat qilishni ta'minlash»ga qaratishini ta'kidladi.
Shimoliy Koreya rahbari avvalgi nutqida mamlakat oziq-ovqat tanqisligiga duch kelayotganini aytgan edi.
Oziq-ovqat tanqisligi: 1 kilogramm banan 45 dollar
Shimoliy Koreya rahbari Kim Chen In Mehnat partiyasi markaziy qo‘mitasi a'zolari bilan uchrashuvda mamlakatda oziq-ovqat tanqisligi mavjudligini tan oldi.
Kim qo‘mita a'zolariga murojaat qilib, o‘tgan yili toshqinlarni keltirib chiqargan to‘fonlar tufayli qishloq xo‘jaligi sektori g‘alla yetishtirish ko‘rsatkichlariga erisha olmaganini aytdi.
Mamlakatda oziq-ovqat mahsulotlari narxi tez sur'atlar bilan o‘sib bormoqda.
Shimoliy Koreya yangiliklarini 2010 yildan beri xorijdan (AQSh, Yevropa Ittifoqi va Janubiy Koreyadan) kuzatib borgan NK News nashri mamlakatda 1 kilogramm banan 45 dollarga sotilayotgani haqida xabar tarqatdi.
Shimoliy Koreya koronavirus tarqalishiga barham berish uchun o‘z chegaralarini yopgandi. Natijada, mamlakatning Xitoy bilan savdosi to‘xtab qoldi.
Shimoliy Koreya oziq-ovqat, o‘g‘it va yonilg‘ida Xitoyga qaram.
Ayni paytda Shimoliy Koreya yadroviy faoliyatiga qo‘yilgan xalqaro embargodan ham aziyat chekmoqda.
«Mashaqqatli yo‘l»
Aprel oyida Kim Chen In avvalgi nutqlariga sira o‘xshamaydigan ma'ruzasida mashaqqatlar haqida gapirgandi. «Odamlar duch keladigan qiyinchiliklarni biroz bo‘lsa-da yengillatish uchun» rasmiylar «bir-birlarini yanada mashaqqatli yurishga undashi» kerakligini ta'kidlagandi.
«Og‘ir safar» tushunchasi ilgari ham Shimoliy Koreya tarixida qo‘llangan.
90-yillarda sovetlar ittifoqi qulashi natijasida Shimoliy Koreyaga hayotiy jihatdan nihoyatda muhim bo‘lgan tashqi yordam uzilib qolishi ortidan mamlakatda yuzaga kelgan ochlikka qarshi kurashish jarayoniga shunday nom berilgan edi.
O‘sha paytda ochlikdan vafot etgan shimoliy koreyaliklarning soni hali ham aniq emas, ammo taxminlarga ko‘ra, bu raqam 3 millionga yetgan.
AQSh bilan munosabatlar
AQSh prezidenti Jo Bayden o‘z saylovoldi kampaniyasida Kimni «qaroqchi» deb atagandi. Baydenning inauguratsiyasidan bir necha kun oldin Shimoliy Koreya ulkan harbiy parad o‘tkazgan va unda yangi raketa namoyish qilingandi.
Shimoliy Koreya Bayden tomonidan mamlakatni «global xavfsizlikka jiddiy tahdid» sifatida tavsiflanganiga ham o‘z munosabatini bildirdi.
AQSh esa Koreya yarim orolini to‘liq yadrosizlantirish bo‘yicha olib borilayotgan harakatlarni davom ettirishini e'lon qildi.
«Bizning siyosatimiz katta bir savdolashishga qaratilmaydi. Shuningdek, u strategik sabrga ham tayanmaydi», dedi Oq uy vakili Jyen Psaki.
Psakining aytishicha, AQSh «diplomatik vositalarni sinab ko‘rishda ham o‘lchovli va amaliy yondashuvni qo‘llaydi».
Kim Tramp bilan uch marta uchrashgandi
Kim Chen In Baydendan oldingi prezident Donald Tramp bilan uch marta uchrashgan, ammo bir muncha vaqt o‘tgach, yadroviy qurolsizlanish bo‘yicha muzokaralar to‘xtagandi.
«Bayden ma'muriyati to‘p Shimoliy Koreyada ekanligini aytdi», deydi Seuldagi Ixva ayollar universiteti xalqaro aloqalar bo‘yicha mutaxassisi Leyf-Erik Isli. Uning ta'kidlashicha, Shimoliy Koreya o‘z e'tiborini ichki siyosatga qaratmoqda va Vashington tomonidan yanada katta rag‘bat ko‘rishni xohlamoqda. «Pxenyan muzokaralarga pandemiyadan keyingi iqtisodiyoti kuchayganini namoyish etib, ba'zi tahdidkor harbiy sinovlarni ko‘rsatgandan keyingina qaytishi mumkin», deydi u.
