Eronning yangi prezidenti korrupsiya va qashshoqlikka qarshi kurashishga va'da berdi

Eronning saylangan prezidenti Ibrohim Raisiy eronliklar o‘zgarishlarni, korrupsiyaga qarshi kurashish va turmush tarzi yaxshilanishini talab qilayotgani hamda yangi hukumat bu talabni bajarishini aytdi.

"Eron xalqining talabi – o‘zgarishlar. Eron xalqining talabi – korrupsiya, qashshoqlik va diskriminatsiyaga qarshi kurash hamda adolatga erishish", - dedi u.

Raisiyning qo‘shimcha qilishicha, "bu talab yangi hukumat tomonidan eshitilishi shart".

Uning so‘zlariga ko‘ra, "ishbilarmonlik holati, odamlar hayoti va hukumatdagi vaziyatni yaxshilash, ma'muriy tizim islohoti va byurokratiyani yo‘q qilish hukumatning ustuvor vazifasi bo‘ladi".

Eronda prezidentlik saylovi 18 iyun kuni o‘tkazildi. Unda Raisiy 62 foizga yaqin ovoz bilan g‘olib chiqdi.