Самарқанд вилоят судининг жиноий ишлар бўйича судлов ҳайъати 2021 йил 21 июнь куни «EGOIST AST» МЧЖ мансабдорлари берган аппеляция шикоятини кўриб чиқди. Бу ҳақда Kun.uz мухбирига Яккабоғ туман фермер, деҳқон хўжаликлари ва томорқа ер эгалари Кенгаши бош мутахассиси Ғиёсиддин Муҳаммадиев хабар берди.
Ғ.Муҳаммадиевнинг хабарига кўра, «EGOIST AST» МЧЖ билан уруғлик картошка олиш бўйича шартнома тузиб, натижада хуқуқи бузилган Яккабоғ ва Шаҳрисабз туманларидаги жами 404 нафар фермер хўжаликлари фойдасига чиқарилган ЖИБ Пайариқ туман суди ҳукми тўғри чиқарилган деб топилди. «EGOIST AST» МЧЖ мансабдорлари берган аппеляция шикояти рад этилди.
Маълумот учун, жорий йил 17 апрель куни ЖИБ Пайариқ туман судида раислик этувчи Ш.Шарипов зарар кўрган 404 нафар фермер хўжаликлари фойдасига 13 миллиард 444 миллион 603 минг 500 сўм ундириш тўғрисида суд ҳукми чиқарганди.
Kun.uz чириган картошка уруғи тарқатганлик масаласини аввалдан кузатиб келмоқда. Аввалига чириган картошка уруғи тарқатилаётганлик тўғрисида видео тайёрланганди.
Ундан кейин иккала томон ўзини оқлаганди.
Шу воқеалар асносида бош прокуратура фермерларга чириган картошка уруғини ўтказган шахсга нисбатан жиноий иш қўзғатганди.
Биринчи судда айбланувчилар зарарни қопламасдан озод этилган бўлса, 3-4 ноябрь кунлари Қарши туманлараро судида 14 нафар фермерни фойдасига ҳукм чиқарилганди.
