14:32 / 25.06.2021
4271
Оқова сувлар зарарсизлантирилмасдан иншоотга яқин бўлган дарёлар ва сойларга оқизиб юборилмоқда - Сенат
Фото: Олий Мажлис Сенатининг Ахборот хизмати

Сенатнинг ўн олтинчи ялпи мажлисида оқова сув тозалаш иншоотларида вужудга келаётган муаммо ва камчиликларнинг атроф-муҳит ҳамда аҳоли саломатлигига таъсири тўғрисида Вазирлар Маҳкамасига парламент сўрови юбориш масаласи кўриб чиқилди.

Оқова сув тозалаш иншоотларининг ишлаши жойларда ўрганилиб, мамлакатнинг 5,6 млн (17 фоиз) аҳолиси оқова сув хизмати билан таъминлангани, шунингдек, бугунги кунда ҳудудлардаги жами 58та йирик оқова сув тозалаш иншоотларининг 49таси (84 фоиз), 8,6 минг км оқова сув тармоқларининг 1,9 минг км (22 фоиз) қисми таъмирталаб ҳолатда экани таъкидланди.

Ушбу иншоотлар уч босқичда: механик, биологик ва кимёвий тозалаш функциясини бажаришга ихтисослашган бўлиб, аксарият иншоотларда фақат механик тозалаш ишлари бажарилмоқда.

Бундан ташқари, Тошкент шаҳрининг Салар, Бўзсув, Бектемир ҳамда Сурхондарё вилоятининг Термиз шаҳри оқова сув тозалаш иншоотлари бугунги кунда таъмирталаб ҳолатга келиб қолгани аниқланган.

Шу билан бирга, маҳаллий оқова сув тозалаш иншоотлари талабга жавоб бермасдан канализация тармоқларига оқоваларнинг меъёр даражасида тозаланмасдан ташлаб юборилаётгани маълум бўлган.

“Республикамизнинг барча вилоятларида оқова сув тозалаш иншоотлари таъмирталаб, малакали кадрлар етишмаслиги ва мавжуд жиҳозларнинг эскирганлиги сабабли тўлиқ фойдаланилмасдан, оқова сувлар зарарсизлантирилмасдан иншоотга яқин бўлган дарёлар ва сойларга оқизиб юборилмоқда”, дейилади маълумотда.

Ушбу масала юзасидан Сенатнинг тегишли қарори қабул қилинди.

Top