Samarqand viloyatidagi 62ta maktab filialiga yangi bino qurib beriladi

Viloyat hokimligi axborot xizmatining xabariga ko‘ra, bugun xalq deputatlari Samarqand viloyati kengashining navbatdagi sessiyasi o‘tkazilmoqda. Sessiya ishida bir qator dolzarb masalalar yuzasidan muhokamalar o‘tkazilgan va tegishli qarorlar qabul qilingan.

Jumladan, deputatlar Samarqand viloyatdagi 62ta maktab filiali uchun yangi bino qurib berish haqidagi qarorni ma'qullagan. Filiallar binolari sendvich panellardan quriladi. Deputatlar bu uchun mahalliy budjetdan pul ajratish to‘g‘risida qaror qabul qilgan.

Samarqand viloyati Xalq ta'limi boshqarmasi axborot xizmatining xabar berishicha, bugungi kunda viloyatda jami 184ta maktab filiali bor. Xalq deputatlari viloyat kengashi qabul qilgan qarorga ko‘ra, ular orasida hashar yo‘li bilan, qo‘lbola tarzda qurilgan, sharoiti og‘ir maktab filiallariga yangi binolar qurib beriladi.