Qozog‘istondagi YTHda bir nafar o‘zbekistonlik vafot etdi, 7 kishi kasalxonaga tushdi

Kecha, 28 iyul kuni mahalliy vaqt bilan soat 7:10larda Aktyubinsk viloyati, Qarabutak mahallasidan o‘tadigan «Samara-Chimkent» xalqaro avtomobil yo‘lining 992-kilometrida Qozog‘iston fuqarosi boshqaruvidagi «Toyota Previa» avtomashinasi ishtirokida yo‘l-transport hodisasi sodir bo‘ldi, deb xabar bermoqda «Dunyo».

Foto: Dunyo

O‘zbekistonning Aqtau shahridagi Bosh konsulxonasidan ma'lum qilishlaricha, yo‘l-transport hodisasi natijasida avtomobil haydovchisi va Aqtau shahriga ishga ketayotgan 8 nafar yo‘lovchi (barchasi O‘zbekiston fuqarolari) turli darajadagi tan jarohati bilan shahar shifoxonasiga yotqizilgan.

Yuz bergan hodisa oqibatida 43 yoshli fuqaro N.D. vafot etgan. 5 nafar yo‘lovchi davolanmoqda. Yana ikki nafar yo‘lovchiga esa shifoxonadan javob berilgan.

Bosh konsulxona vaziyatni o‘z nazoratiga olgani aytiladi.

Marhumning jasadini vatanga yetkazishni tashkil etish va jabrlanganlarga yordam ko‘rsatish choralari ko‘rilmoqda, deyiladi xabarda.