Tojikistonda tog‘dagi turistlarni qutqarish uchun borgan vertolyot halokatga uchradi

Uchuvchi halok bo‘lgan, vertolyot bortidagi to‘rt kishi jarohatlangan.

Foto: Sputnik

Tojikistonda tog‘da qolib ketgan rossiyalik turistlarga yordam berish uchun yo‘l olgan vertolyot halokatga uchradi. Bu haqda RIA Novosti xabar bermoqda.

Xabarda aytilishicha, uchuvchi halok bo‘lgan, vertolyot bortidagi to‘rt kishi jarohatlangan.

Turistlar Poymozor darasidagi muzlikni zabt etish uchun ko‘tarilgan bo‘lgan.

«28 iyulda olti ming metrdan yuqori balandlikda turistlardan biri ko‘chki ostida qolgan. Boshqalar bu haqda xabar berganidan so‘ng ular bilan aloqa uzilib qolgan», – degan agentlik suhbatdoshlaridan biri.

Uning so‘zlariga ko‘ra, vertolyot muzlikka qo‘nish chog‘ida halokatga uchragan.

Halokat yuz bergan joyga qutqaruvchilar yo‘l olgan.