Braziliyada ikki vertolyot to‘qnashdi: mashhur xonanda Oliver Tri halok bo‘ldi

Fojia 14 iyun kuni Rio-de-Janeyro shahrining Rekreyo-dus-Bandeyrantes tumani osmonida sodir bo‘lgan. Mahalliy qutqaruv xizmatlari ma’lumotlariga ko‘ra, ikki vertolyot havoda to‘qnashib ketgan va shundan so‘ng yerga qulab tushgan.

Vertolyotlardan birida besh nafar yo‘lovchi, ikkinchisida esa uchuvchi bo‘lgan. Hodisa oqibatida barcha yo‘lovchilar va pilot halok bo‘lgan.

Xalqaro axborot agentliklari politsiya manbalariga tayanib xabar berishicha, qurbonlar orasida 32 yoshli amerikalik xonanda va qo‘shiq muallifi Oliver Tri ham bo‘lgan. U Braziliyaga jahon gastrol safari doirasida tashrif buyurgan edi.

Halok bo‘lganlar orasida, shuningdek, braziliyalik musiqa prodyuseri, argentinalik videorejissyor va YouTube blogeri Gaspar Prim ham borligi aytilmoqda.

To‘qnashuvdan keyin har ikki vertolyot elektromobillar avtosalonining avtoturargohi hududiga qulab tushgan. Zarba oqibatida yong‘in kelib chiqqan va qariyb 20 ta avtomobil yonib ketgan.

Huquq-tartibot idoralari va qutqaruvchilar hozirda hodisa sabablarini o‘rganmoqda. Tergovning dastlabki bosqichida texnik nosozlik, inson omili yoki parvozlarni muvofiqlashtirishdagi xatolar ehtimoli ko‘rib chiqilmoqda.

Rasmiylarning bildirishicha, qurbonlarning jasadlari qattiq kuygani sababli ularni darhol tanib olish imkoni bo‘lmagan. Shu bois shaxslarni aniqlash uchun qo‘shimcha ekspertizalar o‘tkazilmoqda.

Oliver Tri so‘nggi yillarda xalqaro miqyosda mashhurlikka erishgan ijrochilardan biri hisoblanadi. Uning Life Goes On, Miss You va Alien Boy kabi qo‘shiqlari millionlab tinglovchilarga ega bo‘lib, Spotify platformasida har oy 11 milliondan ortiq foydalanuvchi uning ijodini tinglab kelar edi. Ayrim kompozitsiyalari esa 700 milliondan ziyod eshitilgan.