Afg‘oniston mavzusida feyk va spekulyatsiyalarga yo‘l qo‘ymaslik kerak – Sherzod Asadov

Prezident matbuot kotibi Sherzod Asadov an'anaviy brifingda OAV vakillariga davlat rahbari Shavkat Mirziyoyevning o‘tgan haftadagi tadbirlari va joriy haftadagi rejalari bo‘yicha ma'lumot berdi.

O‘z nutqida Sherzod Asadov Afg‘oniston mavzusida axborot tarqatishga jiddiy yondashish zarurligiga to‘xtaldi.

“15 avgust kuni prezident Shavkat Mirziyoyev Rossiya prezidenti Vladimir Putin bilan telefon orqali muloqot qildi. Suhbatda Afg‘onistonda yuzaga kelayotgan vaziyat bo‘yicha ham fikr almashildi. Ikki mamlakat idoralari o‘rtasida mintaqaviy xavfsizlik va barqarorlikni ta'minlashga qaratilgan yaqin aloqalar hamda hamkorlikni davom ettirish yuzasidan kelishuvga erishildi.

Shu o‘rinda, men hurmatli jurnalistlarimizga aytmoqchiman. Albatta, Afg‘onistondagi vaziyat hammaning diqqat-eʼtiborida, hamma uni yoritishga harakat qilyapti. Lekin, bu mavzuda spekulyatsiyaga yo‘l qo‘ymaslikka, ishonchsiz manbalardagi gaplarni tarqatmaslikka chaqiraman.

Mana, kecha Tashqi ishlar vazirligi bayonot berdi. Bundan keyin ham o‘z vaqtida axborot berib boriladi. Bizning pozitsiyamiz shundan iborat, materiallarimiz shunga muvofiq bo‘lishi kerak”, dedi prezident matbuot kotibi.