Bosh prokuratura huzuridagi Departamentning Sergeli tuman bo‘limi tomonidan “O‘zsanoatqurilishbank” ATBning murojaatiga asosan tergovga qadar tekshiruv o‘tkazildi. Bu haqda Iqtisodiy jinoyatlarga qarshi kurashish departamenti xabar bermoqda.
Qayd etilishicha, tekshiruv davomida bankning Sergeli filiali qoshidagi “O‘zgarish bank xizmatlari markazi” nazoratchi-kassiri va bosh mutaxassisi joriy yilning 14-17 iyul kunlari markazning valuta ayriboshlash shoxobchasidan o‘zlariga ishonib topshirilgan 32 500 AQSh dollarini olishga erishib, o‘zlashtirish yo‘li bilan talon-toroj qilganliklari aniqlangan.
Shuningdek, nazoratchi-kassir o‘zlashtirgan mablag‘larining bir qismini “Lacetti” rusumli avtotransport vositasini sotib olish hamda yashash xonadonini ta'mirlash ishlariga sarflab, jinoiy faoliyatdan olingan daromadlarini legallashtirgani aytilgan.
Mazkur holat yuzasidan Jinoyat kodeksining 167-moddasi (o‘zlashtirish yoki rastrata yo‘li bilan talon-toroj qilish) va 243-moddasi (jinoiy faoliyatdan olingan daromadlarni legallashtirish) bilan jinoyat ishi qo‘zg‘atilib, tergov harakatlari o‘tkazilmoqda.
