Pentagon matbuot kotibi Jon Kirbi Kobul aeroportini qo‘riqlayotgan amerikalik harbiylar aeroport oldida to‘plangan afg‘onlarning biridan go‘dakni olib ketganlari videosiga izoh berdi. Go‘dakning harbiylar tomonidan olib ketilishi lavhalari butun dunyo bo‘ylab tarqaldi.
Kirbining ta'kidlashicha, betob bo‘lgan bolakayni harbiylarga uning otasi bergan. Bolaga tibbiy yordam ko‘rsatilgach, u otasiga qaytarilgan. Kirbi harbiylarning ushbu ishini “insonparvarlik akti” deb atagan.
“Ota dengiz piyoda askarlaridan betob bolasiga yordam berishni iltimos qilgan. Shunda devor ustidagi harbiylardan biri engashib, bolani otasidan olgan. Bola aeroport hududidagi norveg gospitaliga olib borilgan. Gospitalda unga tibbiy yordam ko‘rsatilgan, so‘ng otasiga qaytarilgan”, deb ma'lum qilgan Pentagon vakili.
Ayni vaqtda Kobul aeroportiga 6 mingga yaqin amerikalik harbiy tashlangan. Ular amerikaliklar, AQShga yordam bergan afg‘onlar va uchinchi davlatlar fuqarolarining Afg‘onistondan xavfsiz olib chiqilishini ta'minlashmoqda.
