Iroqda IShID jangarilari hujumi oqibatida 20dan ortiq inson halok bo‘ldi

OAVning ma'lumot berishicha, IShID jangarilari Ar-Rashad qishlog‘ida bir guruh yoshlarga hujum qilgan, so‘ngra uylarga turli qurollardan tartibsiz ravishda o‘t ochishgan.

Foto: AP

Iroq sharqida joylashgan Diyala viloyatidagi qishloqlardan biriga IShID terrorchi tashkiloti jangarilarining hujumi oqibatida 23 kishi halok bo‘ldi. Bu haqda Al Arabiya telekanali xabar bermoqda.

Avvalroq Al Hadath telekanali 15 kishi qurbon bo‘lgani haqida ma'lumot bergandi.

Iroq OAVning ma'lumot berishicha, IShID jangarilari Ar-Rashad qishlog‘ida bir guruh yoshlarga hujum qilgan, so‘ngra uylarga turli qurollardan tartibsiz ravishda o‘t ochishgan.

Terrorchilar harbiy xizmatchilar qishloqqa yetib kelganidan so‘ng ortga chekingan.

Shafaq News portali o‘z manbasiga tayanib, Nahr al-Imom qishlog‘iga ham hujum uyushtirilganini ma'lum qilgan. Portalning yozishicha, noma'lum shaxslar yetti kishini o‘ldirgan va bog‘larga o‘t qo‘ygan.

IShID jangarilari 2014 yilda Iroq hududining uchdan bir qismiga yaqinini egallagandi. 2015 yilda Iroq hukumat kuchlari xalqaro koalitsiya yordamida ekstremistlar egallagan hududlarni ozod qilish bo‘yicha keng ko‘lamli operatsiya boshladi. 2017 yil dekabrda IShID mag‘lub etilgani e'lon qilindi.