Navoiydagi mansabdor ishi: shahar hokimligi 1 mlrd budjet pulini talon-toroj qilgan mulozimni nega qo‘llamoqda?

Navoiy shahar obodonlashtirish boshqarmasi boshlig‘i Yusuf Tursunov davlatning 1 mlrd so‘mdan ortiq pulini talon-toroj qilgani uchun sud hukmi bilan mansabdor bo‘lish huquqidan mahrum qilinib, axloq tuzatish ishlari jazosiga tortilgani, ammo u 2 oy davomida lavozimidan bo‘shatilmay kelgani haqida Kun.uz surishtiruvi e'lon qilingan edi.

Surishtiruvdan so‘ng mavzuning yangi tafsilotlari ma'lum bo‘ldi. Avvaliga sud va IIB probatsiya xizmatidagi mas'ullarning bemalolxo‘jaligi haqida so‘z yuritamiz.

Navoiy shahar sudi va IIB binosi o‘rtasida masofa taxminan 4 km, lekin hujjatlar 1 oyda yetib boradi

Maydoni uncha katta bo‘lmagan shaharda sud hukmi birinchi manzildan ikkinchi manzilga yetib borishda qanday “yo‘llarni bosib o‘tgani”ga to‘xtalmay iloj yo‘q.

Yusuf Tursunovni mansabdorlik va moddiy javobgarlik ishlarida ishlash huquqidan mahrum qilish to‘g‘risidagi sud hukmi 2021 yil 18 avgust kuni kuchga kirgan. Hukm ijrosini ta'minlashi kerak bo‘lgan hujjat shahar jinoyat sudida qariyb bir oy yotgan.

2021 yilning 16 sentabr kuni maxsus aloqa xizmati orqali hukm Navoiy shahar IIB probatsiya guruhiga jo‘natilgan.

Idoralar orasidagi masofa nari borsa 4 km bo‘lgan bir vaqtda 16 sentabr kuni yo‘lga chiqqan konvert o‘z manziliga naq 8 kun deganda –24 sentabr kuni yetib keladi.

Hukm IIBda ham 10 kun “mehmon” bo‘ladi.

Ijro hujjati mahkumdan berib yuborilganini qanday baholash mumkin?!

Navoiy shahar IIB probatsiya guruhi katta inspektori Ulug‘bek Sharipovning Kun.uz'ga ma'lum qilishicha, lavozimdan ozod qilish haqidagi xat 2021 yilning 4 oktabr kuni pochta yoki boshqa biror aloqa vositasi orqali emas, nimagadir aynan Yusuf Tursunovning o‘zidan Navoiy shahar hokimligiga berib yuboriladi.

Bu taqdimnoma ham qisqa masofaga uzoq yo‘l bosadi: oradan 14 kun o‘tib, 2021 yil 18 oktabr kuni hokimlikka “yetib keladi”. Xatni aynan Tursunovning o‘zi olib kelganmi yoki masala jamoatchilik diqqat markaziga tushganidan keyin mas'ullar “tipirchilab” qolishdimi, bunisi Kun.uz'ga qorong‘i.

Korrupsiyaga qarshi kurashish agentligining chala xulosasi

Vaziyat Kun.uz orqali jamoatchilikka ma'lum bo‘lgach, masalaga Korrupsiyaga qarshi kurashish agentligi e'tibor qaratgani va go‘yoki hammasi risoladagidek bo‘lganini ma'lum qildi.

Ammo, agentlik bir hujjatning bir idoradan ikkinchisiga, ikkinchisidan uchinchisiga yetib borishi uchun jami 2 oy vaqt sarflanishidagi harakatsizliklarga ko‘z yumdi.

Ishdan olishga sud hukmi emas, xodim arizasi asos bo‘lmoqda

Aksilkorrupsion agentlik e'tiboridan chetda qolgan yana bir holat bor.

2021 yil 18 oktabr kuni Navoiy shahar hokimining “Xodimlar to‘g‘risida”gi qarori qabul qilingan. Unga ko‘ra, Navoiy shahar obodonlashtirish boshqarmasi boshlig‘i Yusuf Tursunovga 2020–2021 yillarda ishlagan davri uchun 2021 yil 18 oktabr kunidan 24 ish kunidan iborat mehnat ta'tili berilgan hamda sog‘ligini tiklash uchun bir oylik maoshi miqdorida moddiy yordam ajratilgan.

Shuningdek, sudning ajrimi emas, Yusuf Tursunovning arizasi inobatga olinib, mehnat ta'tili tugagan kundan boshlab mehnat shartnomasi bekor qilingan.

Vaholanki, Mehnat kodeksining 106-moddasiga ko‘ra, xodimni jazoga mahkum etgan sudning hukmi qonuniy kuchga kirgan taqdirda, basharti buning natijasida xodim avvalgi ishini davom ettirish imkoniyatidan mahrum etilgan bo‘lsa, mehnat shartnomasi taraflar ixtiyoriga bog‘liq bo‘lmagan holatda bekor qilinadi.

“Hokimiyat odamgarchilik qilgan” — adliya bo‘limi boshlig‘i

Mehnat shartnomasini bu tarzda bekor qilinishi bo‘yicha Kun.uz muxbiri Navoiy shahar adliya bo‘limi boshlig‘i Azamat Xolmo‘minovning pozitsiyasi bilan qiziqdi.

Uning fikricha, hokimlik Yusuf Tursunovni sud hukmi bilan uning mansabdor bo‘lish huquqidan mahrum qilinganini bilgan kunidan, agar bilmagan bo‘lsa, taqdimnoma kelgan kunidan boshlab ishdan bo‘shatishi kerak edi.

“Yusuf Tursunovni o‘z vaqtida ishdan bo‘shatmagan hamda unga budjetdan ish haqi va rag‘batlantirish to‘lovlari to‘lanishiga yo‘l qo‘yib bergan mas'ullarga ta'sir choralarini ko‘rish bizning vakolatimizga kirmaydi. Bu bo‘yicha mas'ul idoralar shug‘ullanadi.

Hokimlik 2021 yil 18 oktyabrdagi qarori bilan odamgarchilik yuzasidan Yusuf Tursunovni o‘z arizasiga binoan ishdan bo‘shatgandir. Ammo hokimlikning ushbu qarori mehnat qonunchiligiga to‘g‘ri kelmaydi. Avvalo, hokimlik qaror emas, buyruq chiqarishi, qolaversa, sud hukmi ijrosi ta'minlanib, birdan ishdan bo‘shatilishi kerak edi.

Hokimlik noto‘g‘ri qaror chiqarsa, ko‘rib chiqamiz. Lekin ishga qabul qilish yoki ishdan bo‘shatish – ularning o‘zining ishi. Biz bu holat bo‘yicha hech narsa demaymiz», – deydi Azamat Xolmo‘minov.

Nima ham deyish mumkin: bir qarashda qonunbuzarlik “manaman” deb bo‘y ko‘rsatib turibdi, lekin hech kimni yoqasidan tutib, jazolab bo‘lmaydi.

Bu esa davlat ishida ishlovchi mansabdor shaxslar sud hukmi bilan vazifasidan chetlashtirilsa, hukm qonuniy kuchga kirgan kunidan e'tiboran ommaviy axborot vositalarida rasman e'lon qilinishini taqozo etadi.

Ana shunda aslida ishlashga haqi bo‘lmagan mansabdorlar davlat budjeti hisobidan maosh olishmaydi.

Navoiydagi holat esa prokuratura organlari tomonidan to‘liq o‘rganib chiqilib, Tursunovga to‘langan maosh budjetga qaytarib olinishi va vaziyat yuzasidan rasmiy munosabat taqdim etilishi kerak. Toki boshqalarga ham saboq bo‘lsin.