Maykl Jyekson eng serdaromad marhum kishilar reytingida yetakchilikni boy berdi

Reytingga 13 kishi kiritilgan bo‘lib, ular merosi keltirgan daromad deyarli 1 trln dollarni tashkil qilgan.

Ro‘yxatning eng yuqori pog‘onasidan britaniyalik yozuvchi, “Charli va shokolad fabrikasi” hamda “Matilda” kitoblari muallifi Roald Dal (1916-1990) joy olgan. 2021 yil sentyabrda uning merosxo‘rlari Netflix striming xizmatiga Roald Dahl Story kompaniyasini sotishgan. 2022 yil dekabrda yozuvchining asarlari asosida “Matilda”, 2023 yilda esa “Charli va shokolad fabrikasi” filmlarining yangi versiyalari chiqariladi.

2-o‘rinni amerikalik qo‘shiqchi Prins (1958-2016) egalladi. Uning uch merosxo‘ri o‘zlariga tegishli ulushni, jumladan qo‘shiqchining ashulalariga huquqni umumiy hisobda 108 mln dollarga sotgan.

3-o‘rinni Maykl Jyekson egallagan. U asos solgan Mijac Music leybli 75 mln dollar keltirgan.

Yetakchi o‘ntalikdan, shuningdek rassom Charlz Monro Shuls (1922-2000), bolalar yozuvchisi va multiplikator Teodor Syuz Gaysel, qo‘shiqchi va aktyorlar Bing Krosbi hamda Elvis Presli, golfchi Arnold Palmer, shoir-qo‘shiqchi Jyerri Goffin, qo‘shiqchi Lyuter Vandross, reggi uslubidagi qo‘shiqchi Bob Marli, repchi Juice WRLD va marhum bitlzchi Jon Lennon joy olgan.