Samarqandda paxtaning namlik va ifloslik darajasini qo‘shib yozgan klaster laboratoriya mudiriga chora ko‘rildi

Ma'lum qilinishicha, «O‘zagroinspeksiya»ning Payariq tuman bo‘limi tomonidan «Samarqand kotton klaster» MChJda monitoring tadbiri o‘tkazilgan. Tadbir davomida korxonaning laboratoriya tahlilxonasi tomonidan ijro hujjatlari to‘g‘ri yuritilmagani aniqlangan.

MChJ laboratoriya mudiri F.Yu. tomonidan 2021 yil 29 oktyabrdagi kunlik tahlil natijalari soha mutaxassislari ishtirokida qayta tahlil qilinganda dastlab ko‘rsatilgan ko‘rsatkichlardan farq qilgan.

Jumladan, ifloslik 13,2, namlik 14,7 chiqqan bo‘lsa, qayta tahlil natijasida esa ifloslik 11,6, namlik 10,7 ekani ma'lum bo‘lgan.

Qayta tahlil natijalariga ko‘ra laboratoriya mudiri belgilangan talablarni buzgani uchun, unga nisbatan Ma'muriy javobgarlik to‘g‘risidagi kodeksning 212-moddasi 1-qismi bilan ma'muriy bayonnoma rasmiylashtirilgan. To‘plangan hujjatlar qonuniy chora ko‘rish uchun huquqni muhofaza qiluvchi organlarga yuborilgan.