Surxondaryo viloyati Sho‘rchi tumanida davlat raqamini yashirib tez harakatlangan Spark mashinasi Cobalt bilan to‘qnashgan. Oqibatda Spark haydovchisi voqea joyida vafot etgan. Bu haqda viloyat IIB YHXB axborot xizmati xabar bermoqda.
Ma’lum qilinishicha, joriy yil 15 noyabr kuni soat 7:00 larda M41 Bishkek-Dushanbe-Termiz xalqaro avtomobil yo‘lining Sho‘rchi tumanidan o‘tgan 1502-kilometrida odam o‘limi bilan bog‘liq yo‘l-transport hodisasi sodir bo‘lgan.
Spark mashinasi haydovchisi davlat raqamini yashirib, katta tezlikda harakatlangan va boshqaruvni yo‘qotib, qarama-qarshi yo‘nalishga chiqib ketgan. So‘ng ro‘paradan kelayotgan Cobalt mashinasi bilan to‘qnashgan.
Oqibatda Spark mashinasi haydovchisi og‘ir tan jarohatlari olib voqea joyida vafot etgan.
Dastlabki surishtiruvda aniqlanishicha, Spark haydovchisi davlat belgisini yashirib belgilangan me’yorlarni buzgan holda katta tezlikda harakatlangan.
