Bombalar joylangan konteyner portlovchi qurilmalarni zararsizlantirishga ixtisoslashgan kompaniya omboridan o‘g‘irlab ketilgan.
Foto: AP
Iroqning Basra viloyatida yuz dona kassetali bombalar o‘g‘irlab ketildi. Bu haqda Al Arabiya telekanali xabar berdi.
Viloyatning Az-Zubayr okrugi rahbari Abbos Mohirning so‘zlariga ko‘ra, portlovchi qurilmalarni zararsizlantirishga ixtisoslashgan kompaniya omboridan bombalar joylangan konteyner yo‘qolgan.
“Portlamay qolgan bombalarni zararsizlantiruvchi kompaniyalar bunday bombalarni keyinchalik portlatib yo‘q qilish uchun maxsus konteynerlarga to‘playdi”, — dedi Mohir.
Uning qo‘shimcha qilishicha, chorshanba kuni ana shunday konteynerlardan biri o‘g‘irlangani xabar qilingan. Unda 100 dona kassetali bomba bo‘lgan.
Hozirda o‘g‘irlab ketilgan bombalarni qidirish ishlari olib borilmoqda.
