Ироқда ичида 100 дона кассетали бомба бўлган контейнер ўғирлаб кетилди

Бомбалар жойланган контейнер портловчи қурилмаларни зарарсизлантиришга ихтисослашган компания омборидан ўғирлаб кетилган.

Фото: AP

Ироқнинг Басра вилоятида юз дона кассетали бомбалар ўғирлаб кетилди. Бу ҳақда Al Arabiya телеканали хабар берди.

Вилоятнинг Аз-Зубайр округи раҳбари Аббос Моҳирнинг сўзларига кўра, портловчи қурилмаларни зарарсизлантиришга ихтисослашган компания омборидан бомбалар жойланган контейнер йўқолган.

“Портламай қолган бомбаларни зарарсизлантирувчи компаниялар бундай бомбаларни кейинчалик портлатиб йўқ қилиш учун махсус контейнерларга тўплайди”, — деди Моҳир.

Унинг қўшимча қилишича, чоршанба куни ана шундай контейнерлардан бири ўғирлангани хабар қилинган. Унда 100 дона кассетали бомба бўлган.

Ҳозирда ўғирлаб кетилган бомбаларни қидириш ишлари олиб борилмоқда.