Sherzod Asadov: Prezident qarorigacha axborot xizmatlari sohasida 433 kishi ishlagan, bugun ular 1 200 nafardan ortiq 

“Davlatimiz rahbarining 2019 yil 27 iyundagi “Ommaviy axborot vositalari mustaqilligini ta'minlash hamda davlat organlari va tashkilotlari axborot xizmatlari faoliyatini rivojlantirish bo‘yicha qo‘shimcha chora-tadbirlar to‘g‘risida”gi PQ–4366-son qarori asosida respublika ahamiyatiga molik jami 280 dan ortiq idora, muassasa, davlat va xo‘jalik boshqaruvi organlari, viloyat, tuman shahar hokimliklarida birinchi marta, 98 ta davlat organlari va tashkilotlarida esa axborot xizmatlari qayta tashkil qilindi.

Qaror qabul qilingunga qadar axborot xizmatlari sohasida jami 433 nafar mutaxassis faoliyat yuritgan bo‘lsa, bugungi kunda ularning umumiy soni 1 200 nafardan ortiqni tashkil etmoqda.

Axborot xizmatlarining axborot tarqatish manbalari 2019 yilda 559 ta bo‘lgan bo‘lsa, 2020 yilda 1 487 taga, 2021 yil dekabr oyi holatiga 3 600 tadan oshdi. Axborot xizmatlari veb-saytlar, turli ijtimoiy tarmoqlar va video-xostinglardagi sahifalar, mobil messenjerlardagi kanallar orqali ommaviy axborot vositalari va keng jamoatchilikka o‘z sohasiga tegishli ma'lumotlarni yetkazib bermoqda”, – dedi Sherzod Asadov.

Shuningdek, prezident matbuot kotibi ayrim matbuot xizmatlarining rasmiy kanallari yangilanmasligi, veb-saytlarga materiallar muntazam joylashtirib borilmasligini tanqid qildi.

“Jumladan “Veterinariya va chorvachilikni rivojlantirish davlat qo‘mitasi” telegram kanalida 60 dan ortiq tug‘ilgan kunlarga tabriklar joylashtirilgan. Xodimlar o‘zaro munosabatlarining rasmiy axborot manbasiga joylashtirilishi to‘g‘ri emas”, – e'tiroz bildirdi Sh. Asadov.