14:42 / 14.12.2021
5925
Блинкен АҚШ ва Хитой ўртасидаги эҳтимолий низо оқибатлари ҳалокатли бўлишини айтди

У шу билан бирга, Хитойнинг «тажовузкор» ҳаракатлари Жанубий Хитой денгизидаги кемалар хавфсизлигига таҳдид солаётгани ва савдога зиён келтириши мумкинлигини қайд этди.

Фото: AP

АҚШ ва Хитой ўртасида низо юз берадиган бўлса, бунинг оқибатлари ҳалокатли бўлади, деди АҚШ давлат котиби Энтони Блинкен.

«Ўтган ойда президент Байден ХХР раиси Си Цзинпинга мамлакатларимиз ўртасидаги рақобат низога айланмаслиги учун масъуллигимизни айтди. Биз бу масъулиятга жиддий ёндашамиз», — деди у Жакартага ташрифи чоғида.

Блинкен икки давлат ўртасидаги низо оқибатлари «барча учун ҳалокатли» бўлишини айтди.

У шу билан бирга, Хитойнинг «тажовузкор» ҳаракатлари Жанубий Хитой денгизидаги кемалар хавфсизлигига таҳдид солаётгани ва савдога зиён келтириши мумкинлигини қайд этди.

Байден октябрда Хитой Тайванга ҳужум қиладиган бўлса, Вашингтон оролни ҳимоя қилишга тайёрлигини айтганди.

Хитой АҚШнинг Тайванга нисбатан муносабатини хавфли деб ҳисобламоқда.

Top