AQShda 14 dekabrda Luiziana shtatidagi serqatnov avtomobil yo‘llaridan biriga vertolyot quladi. Vertolyotning qulashi yo‘lda ketayotgan mashinalardan birining kamerasida muhrlangan.
Politsiyaning ma’lum qilishicha, Bell 407 rusumidagi vertolyot Bonnet-Karre-Spilvey ko‘prigi yonida qulagan va yonib ketgan. Vertolyotda uchuvchidan boshqa hech kim bo‘lmagan va u voqea oqibatida halok bo‘lgan.
Halokat sababli avtomobil yo‘li orqali harakat qisman to‘sib qo‘yilgan. Bundan tashqari, vertolyot qulashi vaqtida elektr ta’minoti liniyasiga shikast yetkazgan va buning oqibatida yaqin orada yashovchi 20 mingga yaqin odam elektrsiz qolgan.
AQSh fuqaro aviatsiyasi federal boshqarmasi halokat yuzasidan tergov o‘tkazadi.
