АҚШда вертолётнинг серқатнов йўлга қулаши видеога тушиб қолди

АҚШда 14 декабрда Луизиана штатидаги серқатнов автомобил йўлларидан бирига вертолёт қулади. Вертолётнинг қулаши йўлда кетаётган машиналардан бирининг камерасида муҳрланган.

Полициянинг маълум қилишича, Bell 407 русумидаги вертолёт Боннет-Карре-Спилвей кўприги ёнида қулаган ва ёниб кетган. Вертолётда учувчидан бошқа ҳеч ким бўлмаган ва у воқеа оқибатида ҳалок бўлган.

Ҳалокат сабабли автомобил йўли орқали ҳаракат қисман тўсиб қўйилган. Бундан ташқари, вертолёт қулаши вақтида электр таъминоти линиясига шикаст етказган ва бунинг оқибатида яқин орада яшовчи 20 мингга яқин одам электрсиз қолган.

АҚШ фуқаро авиацияси федерал бошқармаси ҳалокат юзасидан тергов ўтказади.