Qirg‘iziston Turkiyaning Bayraktar zarba beruvchi dronlariga ega bo‘ldi

Qirg‘iziston davlat milliy xavfsizlik qo‘mitasi chegara xizmati Turkiyaning Bayraktar zarba beruvchi dronlariga ega bo‘ldi. Bu haqda Qirg‘iziston prezidenti matbuot xizmati xabar berdi.

Qayd etilishicha, uchuvchisiz boshqariluvchi mazkur qurilmalarni Sadir Japarov shaxsan o‘zi ko‘zdan kechirgan.

«Ushbu qurilmalar respublika budjeti mablag‘lariga sotib olindi va ulardan mamlakat mudofaa xavfsizligini ta’minlashda foydalaniladi», — deyiladi Qirg‘iziston prezidenti matbuot xizmati xabarida.

O‘tgan yili Ozarboyjon Bayraktar TB2 dronlarini sotib olgandi.

Sentyabrda esa Ashxobodda Turkmaniston mustaqilligining 30 yilligiga bag‘ishlab o‘tkazilgan paradda Bayraktar dronlari namoyish etilgan.