21:47 / 27.12.2021
16311
“НАТО Россия билан қуролли низога тайёрланмоқда” – Россия мудофаа вазири ўринбосари

Александр Фоминнинг сўзларига кўра, НАТОнинг 2019 йилги ҳарбий стратегиясида Россия «очиқчасига коалицион хавфсизликка асосий таҳдид сифатида» белгиланган.

Фото: NATO / Baltic Battalion

НАТО Россия билан кенг миқёсдаги қуролли низога тайёрланмоқда. Россия мудофаа вазири ўринбосари Александр Фомин ана шундай фикр билдирди.

«Блокнинг ҳарбий қурилиши тўлалигича Россия билан йирик миқёсдаги қуролли низога тайёрланишга қаратилган», — деди у.

Фоминнинг сўзларига кўра, Шимолий Атлантика альянсининг доктрина ҳужжатларида, хусусан, НАТОнинг 2019 йилги ҳарбий стратегиясида Россия «очиқчасига коалицион хавфсизликка асосий таҳдид сифатида» белгиланган.

«Рим декларацияси ҳалигача ўз кучида қолган. Унда Россия ва альянс бир-бирини душман сифатида кўрмаслиги айтилган. Бу 2010 йилда Лиссабонда бўлиб ўтган Россия-НАТО кенгаши саммитида тасдиқланган», — деди Фомин.

21 декабрь куни Россия президенти Владимир Путин НАТОнинг Россия чегарасида қилаётган ҳаракатларини яна бир бор агрессив деб атаб, бунга қарши ҳарбий чоралар кўришга ҳақли эканини таъкидлаганди.

Top