22:34 / 30.12.2021
10946
2021 йилда Ўзбекистон ЯИМ 7 фоизга ўсгани маълум қилинди

Якунланаётган йилда Ўзбекистоннинг ялпи ички маҳсулоти 7 фоизга ўсгани, инфляция узоқ йиллардан бери биринчи марта 10 фоиздан пасайгани расман маълум қилинди. Шавкат Мирзиёев 2022 йилда ҳам ЯИМ ўсиши 7 фоиздан кам бўлмаслиги кераклигини айтди.

Фото: Президент матбуот хизмати

30 декабрь куни президент Шавкат Мирзиёев раислигида келгуси йилда иқтисодиёт тармоқлари ва коммунал соҳа барқарор ишлашини таъминлаш масалалари бўйича видеоселектор йиғилиши ўтказилди.

Фото: Президент матбуот хизмати

Расмий релизга кўра, жорий йилда ялпи ички маҳсулот 7 фоизга, саноат 9,5 фоизга, хизматлар 20 фоизга, қурилиш соҳаси 6 фоизга, қишлоқ хўжалиги 4 фоизга ўсган. Инфляция даражаси 10 фоиздан паст бўлган.

Экспорт ҳажми 16,5 миллиард долларни ташкил этиб, ўтган йилга нисбатан қарийб 1,3 миллиард долларга ошди. Умумий қиймати 12,4 миллиард долларлик 318 та йирик ва 14 мингта ҳудудий лойиҳалар ишга тушди.

Фото: Президент матбуот хизмати

Йиғилишда келгуси йилда ҳам иқтисодиётнинг барқарор ўсишини таъминлаш бўйича вазифалар кўрсатиб ўтилди. Хусусан, ялпи ички маҳсулот ва саноатни 7 фоиздан юқори, хизматларни қарийб 30 фоизга ошириш мақсад қилинган.

Давлат раҳбари янги йилнинг бошиданоқ барча тармоқ ва ҳудудлар тизимли ишлаб, бу мақсадларга эришиш учун мустаҳкам замин яратиш кераклигини таъкидлади.

Фото: Президент матбуот хизмати

Қиш ойларида асосий турдаги қишлоқ хўжалиги маҳсулотларини бозорларга барқарор етказиб бериш бўйича вазифалар белгиланди.

Фото: Президент матбуот хизмати

Электр энергияси, табиий газ, иссиқлик таъминоти, коммунал, соғлиқни сақлаш ва ёнғин хавфсизлиги тизимларининг барқарор ишлаши муҳимлиги қайд этилди.

Фото: Президент матбуот хизмати

Малакали тиббий хизмат кўрсатиш, жамоат, ёнғин ва ҳаракат хавфсизлиги фаолиятини мувофиқлаштириш бўйича ҳам кўрсатмалар берилди.

Top