Qozog‘iston va Turkmaniston bilan chegaraoldi erkin savdo hududlari tashkil etiladi

2022–2026 yillarga mo‘ljallangan taraqqiyot strategiyasini 2022 yilda amalga oshirish bo‘yicha “Yo‘l xaritasi” loyihasiga ko‘ra, mintaqa davlatlari bilan iqtisodiy hamkorlik bo‘yicha qo‘shma komissiyalar faoliyatini yanada faollashtirish va kengaytirish choralarini ko‘rish nazarda tutilgan.

Shuningdek, Qozog‘iston va Turkmaniston bilan chegaraoldi erkin savdo hududlarini tashkil etish bo‘yicha takliflar ishlab chiqish ham mo‘ljallanmoqda.

Bundan tashqari, “Xitoy – Qirg‘iziston – O‘zbekiston” temir yo‘li loyihalari jadallashtiriladi. Mintaqaviy o‘zaro bog‘liqlikning barcha yo‘nalishlari bo‘yicha hamkorlik yanada rivojlantiriladi. 

Iqtisodiy-ijtimoiy ahamiyatga ega bo‘lgan, davlat va jamiyat farovonligi uchun hissa qo‘shuvchi muhim davlatlararo va mintaqalararo loyihalarni ishlab chiqishda faol ishtirok etish va O‘zbekiston manfaatlarini izchil ilgari surish ham nazarda tutilgan.

O‘zbekiston chegaraoldi nazorat-o‘tkazish punktlarini rekonstruksiya qilish va kengaytirish orqali ularning o‘tkazuvchanligini oshirish ishlari amalga oshiriladi. Rekonstruksiya ishlari Davlat bojxona qo‘mitasi talablariga va xalqaro standartlarga mos ravishda amalga oshiriladi.